TADBIRKOR VA YOSHLAR O‘RTASIDA UCHRASHUV TASHKIL ETILDI

Bugun Urganch shahridagi 6-son umumta’lim maktabida «Darital Shoes» mas’uliyati cheklangan jamiyati rahbari, "Shuhrat" medali  sohibi Gavxarjan Djumanova bilan uchrashuv tashkil etildi. 

Tadbirda Urganch shahar maktabgacha va maktab ta’limi bo‘limi boshlig‘i Murod Marimov, maktab direktori Muborak Jumaniyazova, maktab o‘qituvchilari va 10-11-sinf sinf o‘quvchilari ishtirok etdilar. 

Uchrashuv davomida tadbirkor o‘z o‘quvchilik davrlari, tadbirkor sifatida tanilguniga qadar bosib o‘tgan yo‘llari, mashaqqatlari haqida gapirib berdi. 

Tadbirkorlik bilan shug‘ullanmoqchi bo‘lgan yoshlarga o‘z maslahatlarini berar ekan, bugungi kunda mamlakatimizda tadbirkorlar uchun barcha sharoitlar mujassamligi, tadbirkorlarning huquqlari qonun bilan kafolatlanib, ularning faoliyati davlat tomonidan qo‘llab-quvvatlanayotganligini ta’kidladi.
 
Samimiy ruhda bo‘lib o‘tgan bu uchrashuv o‘quvchilar uchun o‘ziga xos mahorat darsi bo‘ldi. 

Shuningdek, G.Djumanova tadbirkorlik sohasiga qiziqishi kuchli bo‘lgan o‘quvchilar bilan alohida gaplashib, ularning intilishlari, kelajakdagi maqsadlari bilan qiziqdi.